CDF-Daai Ṭangṭi Phu Nih Thla Khat Leng Chung Ah SAC Ralkap 95 An Tlaih Hna I Minung 23 Nih Hriamnam An Chiah- Chinram chung ah CDF-Daai ṭangṭi phu le SAC ralkap thla khat leng chung kahdohnak ah SAC lei in ralkap 8 an thi i, minung 95 an tlaih hna pinah hriamnam chiah in aa ap mi hi 23 an si, tiah Chinland Defense Force-Daai nih an thanh.
Nizan February 28 ni ah CDF-Daai nih Montaung Operation an kalpi i SAC ralkap Captain pakhat, Sergeant pahnih le ralbawi dang pakhat telh in minung 15 an tlaih hna. A luancia February 7 ni ah Laungpwaitaung ah CDF-Daai, CNA le tualchung hriamtlai ṭangṭi phu nih kahdohnak an tuah i SAC ralkap lei in ralbawi pakhat le Sergeant pathum telh in minung 22, an zate minung 23 nih an hriamnam an chiah,tiah theih a si.
CDF-Daai nih a luancia February 7 ni ah Hleinsheintaung Operation an kalpi mi ah SAC ralkap le CDF-Daai kaphnih kar kahdohnak ah CDF-Daai ralkap pakhat hliam a tuar ve, SAC ralkap Sah-Kah-Khah-15, Buthidaung hrambunh Khah-Mah-Yah 233 Battalion in Battalion Commander Leutenant Colonel Aung Thun, Major pakhat le Captain pahnih, an zate minung 4 an thi i Major pakhat, Captain 5 le an kuttang ralkap 8, an zate minung 14 an tlaih hna.
CDF-Daai nih February 10 ni ah Loneyintaung Operation le February 21 ni ah Hlaungtwaitaung Operation an kalpi mi kahdohnak ah SAC ralkap Major pahnih, Captain pathum le an kuttang ralkap pahnih, an zate minung 7 zong an rak tlaih hna. February 1-28 tiang CDF-Daai nih Operation an kalpi mi ah kahdohnak voi 4 a chuak i SAC ralkap 4 an thi, minung 59 an tlaih hna i hriamnam tam ngai zong an laak khawh. SAC ralkap tlaih mi 59 chung ah hliam fak ngai a tuar mi 7 an um i hliam a tuar mi pawl cu CDF-Daai sii lei ṭuanvo ngeitu hna nih an thlopbul hna i Geneva Convention phung he aa tlak ning in an zohkhenh hna kong CDF-Daai nih an thanh.