Taingen Sakhan Cu Chin Mipi Ralkap Hna Nih An Lak Khawh Cang. – Tedim peng um Taingen ralkap sakhan cu Chin mipi ralkap phu hna nih January 16 zing ah an lak khawh cang tiah theih a si.
January 12 zaan ah Taingen sakhan cu Chin mipi ralkap hna nih kahdoh hram an thawk. Taingen sakhan an sungh lo nakhnga SAC lei nih Kalaymyo lei in hriamngan le vanlawng in kahdoh an bawmh peng hna bu in January 16 ni zing ah Taingen sakhan cu Chin mipi ralkap hna nih an lak khawh hi a si.
Taingen sakhan hi Kalaymyo in Taingen in Tedim-Tio- Mizoram umkalnak le Kalaymyo- Falam- Hakha kalnak lamtonnak hmun a si caah SAC lei nih hmunhma tha tuk in an lak cia mi sakhan pakhat a si.
Taingen khua um SAC camp um mi hna nih mipi ralkap an si tiah lunghringh mi cu an tlaih mi hna a tlawn ti lo. Taingen khua hi Kalay in Falam – Hakha lei le Taingen in Tedim- Rih lei kalnak lam tonumnak hmun a si caah Kalaymyo in Chinram chaklei hmun paoh hmatpungtin ID le umnak minung an check cemnak hmun zong a si.
Taingen kahdohnak hi, 2023 July 11 zinglei kahdohnak chung ah mipi hriamtlai 5 an nunnak a liam i 2 fak tuk lo in an i hliam tiah CDM Siyin nih cathanh a rak chuah. Kahdohnak chung ah SAC ralkap lei tampi an thi ve. Taingen sakhan voi 4 tiang Chin mipi ralkap phu nih an rak kah bal ko nain an rak la kho lo nain nihin January 16, 2024 ah an lak khawh hi a si.Taingen sakhan kahnak ah Chin mipi ralkap lei nih ram caah nunnak a pe mi, hliam a tuar mi zong an um. SAC lei a thi mi le hliam a tuar mi thawng hi fiang tein theih a si rih lo. 2023 kum December hramthawk in Taingen tualchung mi nih Taingen khua cu an zaam tak cang tiah theih a si.TCLP