US president thimnak a nai chin thluahmah cang caah Trump cu cawl kholo in opposition party nih tuah an tim ve cang. Nai te ah US ramchung state pakhat Colorado nih 2024 thimnak ah Donald Trump vote thlak mi rel piak asi lai lo tiah Colorado biaceihnak sangbik Supreme Court nih biakhiahnak an tuah. Trump sihni pawl nih US Supreme Court ah appeal kan tuah lai tiah timhlamhnak an ngei cuahmah lio ah Maine state ah Top election official nu Shenna Lee Bellows nih Trump vote kan rel piak lai lo tiah a thanh ve.
Maine’s top election official, Secretary of State Shenna Bellows hi Democrats a si. 2014 ah Maine Democratic nih Senate ah nominee an rak tuah mi asi I Republican Susan Collins nih a rak tei mi nu a si. Cu lawng hlah Bellows hi Maine state ah Same-sex marriage/ Nu le nu, pa le pa thitum hi a poi lo tiah biatak tein a rak aupi tu hruaitu a si. Tutan ah 2024 president thimnak ah amah pumpak nawlngeihnak hmang in Trump vote rel piak a si lai lo tiah biachahnak a tuah mi kongah impeachment aa huah khomi asi tiah report nih a langhter.
Paletwa Khuapi Khawe Byuha Sakhan le Point 377 Sakhan Cu AA Nih An Laak. Chinram chung Paletwa khuapi Khawe Byuha sakhan le India-Myanmar ramri Point 377(ပွိုင့် ၃၇၇ ခြေကုပ်စခန်း) sakhan cu AA nih an laak cang. Cu sakhan kahdohnak ah cun SAC ralkap tam ngai an thi i an ruak zong ṭha tein kan phum hna, tiah AA nih an thanh.A luancia December 26, zan suimilam 9:00 hrawng ah Mrauk-U khuapi chung pengkomh palik sakhan cu AA nih an rak laak. December 27 zinglei suimilam 6:10 ah Paletwa khuapi chung Khawe Byuha sakhan siseh an laak ṭhan pinah nizan December 28 zinglei suimilam 9:20 hrawng ah Paletwa peng India-Myanmar ramri um Point 377 sakhan zong a zate in Rakhine ralkap AA nih an laak kong an thanh ṭhan.
Cu sakhan kahdohnak ah cun SAC ralkap tam ngai an thih pin ah an hriamnam le ralkap nih an hmanmi thilri dihlak cu AA nih an laak i, a thimi ralkap ruak vialte cu kan phum dih hna, tiah AA nih an thanh.
Cu pin ah hriamnam chia duh lo in a zaam mi ralkap pawl cu kan kawl cuahmah hna lio a si i, hriamnam he aa apmi ralkap belte cu a himnak hmun ah kan umter hna lai i an chungkhar he i tong kho ding in kan tawlrelpiak hna lai, tiah Rakhine ralkap AA nih cun an thanh.Nihin December 29 chun suimilam 11 hrawng le zanlei suimilam 6 hrawngah SAC ralkap 151 cu Mizoram, Lawngtlai pengkomh Tuisentlang khua ah lutin Mizoram palik sinah an i pe. Hi a zaammi SAC ralkap pawl hi Point 377 sakhan in a zaam mi an si lai, tiah zumh a si.
Mizoram Ramkulh Chung Tuisentlang Khua Ah SAC Ralkap 150 Hrawng Hriamnam He An I Ap (Update)
Chinram le Mizoram ramri Mizoram ramkulh chung, Lawngtlai pengkomh, Tuisentlang khua ah Chinram lei in SAC ralkap 151 cu Tuisentlang khua ah an lut i, Mizoram palik sinah an hriamnam an ap hnu in Assam rifle nih an kalpi hna, tiah theih a si.SAC ralkap pawl hi voihnih luh in an lut i, a voikhatnak cu chun suimilam 11-12 karlak hrawng ah 83 an lut i, a voihnihnak zanlei suimilam 6 hrawng ah 68 an lut ṭhan, tiah Tuisentlang khua mi pakhat nih The Chin Post ah a chim.
SAC ralkap hna lakah hin hliamhma pumi zong an um i, zaanlei sang i a rak lutmi lak ah zawnh buin a lutmi zong an um kong a chimchap. Chinram Paletwa le Rakhine ramkulh chung ah AA nih biatak tein kahdohnak an tuah hnu in Sakhan zeimawzat an laak cang. Atu a rak zaam mi SAC ralkap hna hi Paletwa pengkomh, Myeik Wa(Point 377 camp) in a rak zaam mi an si, tiah kan thawnglaknak nih cun a chim.
Tuisentlang khua ah a zaam mi SAC ralkap pawl hi Assam rifle nih Lunglei khuapi lei ah an hruai hna i, Moreh lei ah an kuat ṭhan hna lai tiah zumh a si. A luancia November thla ah Rih le Tibual sakhan in a zaam mi SAC ralkap 100 leng cu Moreh in Myanmar lei ah kuat an si cang.