Hakha Khua Ah SAC Nih Chungkhar Cazin An Lak, Ralkap Luhnak Kong Ca An Pek Hna— Chin ramkulh, Hakha khua ah SAC kuttang palek le zung rianṭuantu pawl nih Keisih sang lei ah chungkhar cazin an lak i ralkap luhnak kong ca an pek hna tiah thawng kan theih. March 18 zinglei thawk in Hakha um SAC pawl nih lamton le lamṭhen hmun tampi ah himnak an lak hnu in, Keisih sang lei ah chungkhar cazin an lak i ralkap luhnak kong ca an pek hna hi a si.
Hakha khuami pakhat nih “Kan inn ah an rak lut i chungkhar cazin an lak, ralkap luhnak kong he aa pehtlai mi catlap an kan pek i an chuak ṭhan. Palek le SAC tang zung rianṭuantu pawl an si” tiah The Chinland Post ah a chim. SAC nih a luancia February 10 ah Military Service Law a thanh hnu in Myanmar ramchung hmun kip ah tlaihkhihnak, khuabawi zung ah min pek ternak, chungkhar cazin lak le lampi ah a ruang tampi hmang in mino tlaihkhihnak a tuah cuahmah kha hmuh le theih khawh a si.