SAC Vanlawng Bomb Thlak Ruang Ah Minbya Peng Rohingya Mi 23 An Thi I Minung 60 Leng Hliam An Tuar-
Rakhine ramkulh, Minbya peng, Thada khua ah SAC ralkap nih nihin March 18, zinglei suimilam 1:00 hrawng ah raltuknak vanlawng Jet Fighter in bomb an thlak ruang ah Rohingya mi 23 cu a hmun ah an thi colh i minung 60 leng hliam an tuar, tiah tualchung mi nih an chim.
“Minbya peng, Thada khua mi hna cu zan an i hngilh lio ah timh ciammam tein SAC ralkap nih Jet Fighter in an khua lai ah bomb an thlakhnawh hna i a bu in a thi mi le aa hliam mi an umnak a si, aa hliam mi ah ngakchia zong an i tel i kut bul le ke bul mi an tam,” tiah tualchung mi pakhat nih a chim. Thada khua cu Minbya khuapi he meng 3 hrawng a hlatnak ah a um mi khua a si i, inn 300 le milu 2,000 hrawng an umnak a si. Cu khua ah cun Singyipyin khua in ral a zaam mi Rohingya pawl an tamnak a si.
Atu hrawng cu Rakhine ralkap AA nih an laak mi khuapi Minbya, Mrauk-U, Pauktaw le Ponnagyun peng hna ah SAC ralkap nih nifatin ti tluk in hriamngan le vanlawng in kahdohnak an tuah, tiah tualchung mi nih an chim.
UNOCHA nih a luancia March 3 ni tiang an langhter mi cazin ning ah Rakhine ramkulh chung i kahdohnak ah tualchung mi 170 leng an nunnak a liam i, hliamtuar mi 400 leng an um. TCP