SAC ralhrang nih an sermi phunghram cherhchan in ramchung mino kum 18-35 karlak cu ralkap training auh dingin biachahnak a tuah cang. Ralhrang nih hin khuapi khuate tuanvo ngeitu sinah phungning tein mino cuzat khazat tiin thawngthanhnak a tuah kho men. Atuah zongah mino an um lai lo ti cu a theih tuk cia cang.
Cucaah training auh dingin biachahnak a tuah hnuhnu cun an umnak hmun le khua poh ah mino tlaih ding lawnglawng an kawl cang lai. An tlaihmi hna cu training ah an kuat thluahmah te hna lai ti hi zumh a si. Cu caah Hakha khuapi chungah a herhlo in ralhrang nih mino an tlaih thluahmah te hna lai caah khuapi um kan mino le hna iralring cikcek uh. Tlaih hnu ahcun chuah than ti cu a um tuk lo khomi asi cang.
Patheinkyi Peng Ah SAC Ralkap Nih Mino 35 An Tlaih Hna- Mandalay ramṭhen, Patheinkyi peng Ungchaw khuakomh ah SAC ralkap nih mino 35 cu February 14 zan ah an luhhnawh hna i an tlaih hna, tiah tualchung mi hna nih Khit Thit Media ah an chim.
February 14 zan ah Patheinkyi peng Amaysetaw khua le Tamauksoe khua mi mino 35 cu SAC ralkap nih an tlaih hna i khuabawi hna cu khua khat ah mino 20 chuahpi dingin an chimh hna, tiah theih a si.
SAC ralkap nih Amaysetaw khua mi 20 le Tamauksoe khua mi 15 zong ralkap tla dingin SAC ralkap nih an tlaih hnanak kong cu tualchung mi pakhat nih Khit Thit Media ah a chim. Cu ṭhiamṭhiam in Ayeyarwaddy ramṭhen, Zalun peng Kyonkyaik khua mi mino 2 zong SAC ralkap nih an tlaih hna leng ah khuate dang ah khua khat ah mino 20 cio chuahpi dingin SAC ralkap nih an hal hna, tiah theih a si.
February 13 zan suimilam 11:00 ah Ayeyarwaddy ramṭhen Inkapu peng Bepyia khua mi mino 5 zong SAC ralkap nih an tlaih hna. February 14 zinglei ah Mandalay ramṭhen, Myingyan peng ah sangbawi hna nih ralkap tlak ding kong meeting an auh i ralkap tla ding min cazin pek ding ah tualchung mi hna cu an chimh hna, tiah theih a si.