Ukraline le Russia idohnak thatlei a panh kho lo, Russia nih hriamnam lian lian hmang in a phomh chin lengmang. Nain nihin tiangah Russia nih Ukraine cu duh ning in a tuah kho lo. Nizan ah Ukraine doh dingin Rili Nak/ Black Sea timi ah a ra cuahmah mi Russian military ship, the Caesar Kunikov pi cu Ukraine nih Naval Drone hmang in a kah I Russia lawngpi cu rili ah a pil tiah Ukraine tuanvo ngeitu nih an chim. msn
Thanlyin Peng Ah Kum Tlinglo Hngakchia Telh In Mino Pawl An Tlaih Hna — Yangon ramṭhen, Thanlyin peng, Ngwe-than-win sang ah mino pawl pawṭa an suai hna i Thanlyin pura tlang pawng um ralkap sin ah an khawmh hna tiah tlaih a tong mi hngakchia nu le pa nih Khit Thit ah an chim.
February 12 ah ralkap, palek le uknak phu pawl nih Thanlyin peng, Ngwe-than-win sang ah innkhat hnu innkhat lut in mino pawl an tlaih hna, an tlaih mi hna chung ah kum tlinglo hngakchia zong an i tel tiah theih a si.Ralkap nih an tlaih mi hna cu zarh 2 a rauh hnu ah kan kuat ṭhan hna lai tiah an chim nain pehtlaihnak an tuah ti hna lo tiah theih a si.Cun Yangon ramṭhen chung sang kip ah sang 1 nih mino 20 cazin pek ding tiah SAC nih cazin an rak kholh tiah Khit Thit nih a langhter.
Military Service Law An Thanh Hnu, Hakha Ah SAC Ralkap Nih Mino 2 An Tlaih Hna Tiah Theih A Si — Chin ramkulh, Hakha khua, Calvary sang ah SAC ralkap nih mino 2 an tlaih hna tiah Hakha khuami pakhat nih The Chinland Post ah a chim.SAC nih Military Service Law (စစ်မှုထမ်းဥပဒေ) a thanh hnu February 12 zaanlei ah atu bantuk in Hakha ah ralkap nih mino 2 an tlaih hna hi a si tiah kan theih.
“February 12 zaanlei sang ah mino 2 cu Calvary sang, No. 4 B.E.H.S thlang tiva hor (ရေပြွန်) ah zuu an din lio ah SAC ralkap nih an tlaih hna. An kut an thlir ter hna i an phone an lak piak hna hnu ah an mawṭaw in an kalpi hna tiah thawng kan theih” tiah Hakha khuami pakhat nih The Chinland Post ah a chim. Sihmanhsehlaw hi kong he pehtlai in The Chinland Post nih mit in a hmutu (witness) le thawngpang fiang tein a thei mi kan hal kho hna lo, a dik bak ko tiah adang lam in kan fehter khawh mi a um lo. TCLP